Saturday, April 11, 2009

ස්තුතියි පො‍්‍රමිතියස්

හැන්දෑවෙ කාමරෙන් එලියට ආවෙ
දුම්වැටිය දල්වන්න
ඈත ආකහේ රන්පාට ඉරෙන් ගින්දර ගන්න
පියාඹලා යන මොක්කුන්ද කුරුල්ලෝ වගයක්
ගිනි කුරුල්ලෝ...වෙන්නැති

හදිසියේ පො‍්‍රමිතියස් මෙන්න
ගින්දර අරං ඇවිත් මා ඉස්සරහම
දල්වගෙන අලියා ගිනි කූරක්
දෙවියො වෙන්නැති අර ඈත ඔරවන් ඉන්නේ
ඈතින් කඳු මුදුනේ...

ඔවු දෙවියො තමයි
තරහයි මට ගින්දර දුන්නට


අන්න පො‍්‍රමිතියස් ගිජිකුළු පව්වෙ
දම්වැල් ලා ගැට ගහලා
දෙයියො දඩුවම් දීලා ප්‍රොමිතියස් ට; අහිංසක



මම දුම් වළලු මැදින් දැක්කා
අර ගින්දර සොයා ගිය ගිනි කුරුල්ලෙක්
පො‍්‍රමිතියස්ගෙ අක්මාවට කොටනවා

මහ මෙරත් නො ඉවසන දඩුවමක්!

ගින්දර දුන්නට ස්තුතියි පො‍්‍රමිතියස්

මම මගේ පෙණහල්ල තවනවා
උඹ අක්මාව දන් දුන්නට
මගේ ගින්දර අවුලන්න

උඹ ගලක් උඩ වැතිරිලා
ගිනි කුරුල්ලන්ට අක්මාව කන්න ඇරලා
වෙදනාවෙන්
මගේ නිදහස ගැන උදම් අනනවා...
මම විතරක් නිදහසේ ඇවිදිනවා
තාමත් දුම් බොනවා...

ස්තුතියි පො‍්‍රමිතියස් !
අපි දෙන්නම
එක වගෙයි...

ඩෝසන් ප‍්‍රීති 200904

Thursday, April 9, 2009

සෙමට පිතට ආදරය සහ පේ‍්‍රමය

සෙමට පිතට ආදරය සහ පේ‍්‍රමය

නුඹ දෝතින් ගෙනා
හිස් හෙප්පුව
මට පෙනුනා බුලත් කොල අතුරුදන් වෙලා
හෙප්පුව පතුලේ මම දැක්කෙ
එක්තැන් වෙච්ච තාත්තා

නුඹෙ ඔසරියේ රැලි වලා පොටෙ
හීන් රටා ගල් බිංදු වැල
සුළගට පැද්දුනේ නැහැ
තාත්තාගෙ සුසුමටයි
ඔපනැලි රැගුවෙ

මම විතරයි
ඒ රැලි දැක්කේ
පණ ගහන ලූල්ලු වගේ

නුඹෙ ඇස්වල
කළුම කළු ඉංගිරියාවෙ
ඇඳිලා තිබ්බෙ
එහා ලෝකයක සිතියමක්
ටෙක්ටෝනික් ප්ලේට්; වතුරෙන් මතු උන
අඳුරු සොහොන් ගැබක් තරම්
නිශ්චල
ඩයිනෝසරයන් වැළලුන

මම බුලත් හෙප්පුව අතට ගත්තා.

ඊ ඒ ඩෝසන් ප‍්‍රීති

200904

කවියා දුටු ගණිකා ස්ත‍්‍රී නිමිත්ත

කවියා දුටු ගණිකා ස්ත‍්‍රී නිමිත්ත

රොස පෙති යුගලකි
තැලී ගිය දස දහස් වර
රාගී සරා සඳ
වැදි වැදී පොලා පැන
නිමක් නැති තැවුම් ඉවසන
රොස පෙති යුගලකි
මැද ඇගේ දග යුග


එදෙස මම බලා හිඳිමි
නොවෙ ප‍්‍රාණය
පුරුෂ නිමිත්තට
තලන්නට ඔය රොස පෙති යුග
අනන්ත වරෙක ඔය
සලෙල මිටි පහර කෑ
රොස පෙති යුග කියයි ඒ දුක


"මහත්තයා ඇයි
කල්පනා කරන්නේ
ආව කාරිය කරන් යනු මැන
අමතක ද කට්ටිය
තව එළියේ බලං බව?"



ඩෝසන් ප‍්‍රීති
200904

Wednesday, April 8, 2009

යකඩ දිසාපාමොක්

යකඩ දිසාපාමොක්

පුංචි කාලේ මම ඉඳහිට ඇණ මුරිච්චි එක්කහු කළ
පුංචි පෙට්ටියක් සුරුට්ටු තිබුනා මා සන්තකේට
කිසි කෙනෙකුට පෙන්නුවෙ නැති, අල්ලන්නට දුන්නේ නැති
ඇණ -මුරිච්චි -නූල් රෝද -දැති රෝද ද රබර් පටි ද එහි තිබුණා මතකයි මට

හොර අරක්කු විකුණ යෙහෙක මැන්ඩිස් මාමා කල් ඇරි
මුඩුක්කුවක් වූ ඔහුගේ අබලි පිරුණු කඩකාමරෙ
මට පෙනුනේ දෙව් ලොව ලෙස මහ විසාල යකඩ පිරුණු
මකුළු දැල් ද තඩි මීයන් ගැරඩියන් ද වාස කොට ගත්

ළිඳක් තිබුනා මහා ගැඹුරු; සීතල වතුරත් සපිරුණු
කසිප්පු වඩියක් ගහලා හවසට වැඩ අහවර කර මුට්ට කරගහන මාමලා
එතන තමයි නෑවෙ ලෑවෙ හොඳ පදමට සූර් වෙලා
තම්බපු මංඤොක්කා කාලා හරිමි රජ සැපා කියමින් කෑ කොස්සන් ගහලා නටලා

මැන්ඩිස් මාමාගෙ වාඩිය සතුට ඉතිරිලා පැතිරුන
සාජ්ජයක් වෙයි හවසට පැදුරු එලන් ගංජ ඔතං වටෙ ඉඳං රගන රැගුම්
රණ්ඩු සරුවලක් ඉඳහිට වුවත් නොවුවා සේ සියල්ල
ඊළග දවසේ එක් වෙයි; පරණ තරහ මරහ විහිළු විකාර බවට පත් වෙයි

ඉඳහිට බර කළු ගැහිච්ච ජියර් රෝදයක් ගෙනවිත්
ඒ අතට මෙ අතට පෙරල මගේ පුංචි ඇගිලි තැළුණ
ඒ වෙදනාවටත් වඩා ජියර් රොදයේ වගතුග කතන්දරය
අහන් ඉන්න මම ආසයි අර කසිප්පු ගඳින් මුවින්

යකඩ කෑලි ඔන අතක ඔන විටෙක හසුරන හැටි; අමුණන හැටි
මහ විශාල පාඩමක්ය දිවා රැයක් වෙනසක් නැති
යකඩ දිසාපාමොක් යැයි මැන්ඩිස් මාමාට පටබැඳි
නමෙ තේරුමක් මට නම් දැනුනේ නැහැ අද වනතුරු

මජං අත පුරා ගෑවුනු කලට මගේ දෑත් අරන්
ලයිප්බෝයි ගාලා සේදු; මුහුණෙ දැලි රැවුලු ඇන්දු
හක හක ගා හිනා වෙවී අගුරු වලින් මැදි දත කට
විලිස්සා පෙන්වමින් හිනැහුන; කසිප්පු මිස වෙන ගඳ නැති

පුංචි දිනපොතේ සීවලි
අරක්කු ණය ලියා උන්නු
මෙන්ඩිස් මාමා; මට දැනුනේ
මහ විශ්ව කර්ම දෙවිඳු
ඇසුරට මට ලැබුණ බවකි

මැන්ඩිස් මාමා දවසක් උසාවියෙන් ආ වරෙන්තු
දැක එල්ලිලා මැරුනෙත්
දඩ ගෙවන්න සල්ලි නැතිව
ඒ විසාල යකඩ ගොඩට උඩින් තිබ්බ බාල්කයේ


එදා ඉඳලා කවුරුත් නාන්න නිතර දෙවෙලේ රිංගපු
මැන්ඩිස් මාමාගේ පොදු ලිඳ අවට දිය සෙවෙල් බැඳිලා
පනිට්ටුවත් හොරු අරගෙන යකඩ ගොඩත් මළකඩ කා
දිරා ගියත් කිසිවෙක් නැහැ ආවෙම ඒ පළාතකට

ග‍්‍රීස් ගඳින් භූමිතෙලින් ඩීසල් තෙල් එකට මුහුව
අමුතු යකඩ ගඳින් යුත්ත හොර අරක්කු දේවාලේ
දෙවියන් හැර ගිය හිස් තිර පට ලෙස දොරගුලු හැර
පොලීසියෙන් සීල් තියා දේව රූප අරන් ගියා

මගේ සුරුට්ටු පෙට්ටියෙ හුන් යන්තර සූත්තර අස්සේ
කාන්දම් කැවූ දැති රෝදය රහසක් ලෙස සුරකින්නට
සුරැකිව අද වෙනතුරු තියා ගත්තා හිත ඇතුලේ
දවසක සුදු මහත්තයා මෙවා කරකවනා හැටි
ඉගෙන ගත යුතු බව රහසින් මට කියා දුන්නා

මැන්ඩිස් මාමා මට දුන් කාන්දම් කැවූ රෝදය
මිල කළ නොහැකි තරම් වටිනා දෙයක් බවට
අගේ කරල අගේ කරල දුන්නු දෙයක් නිසා මෙමට
පොලීසියෙන් ඇවිත් සොයන වස්තුව එය විය යුතු බව
පුංචි මමත් බියෙන් තැවී අර පාළුව ගිය ලිඳ වෙත
ගොම්මන් වෙලාවක දුව ගොස් සුරුට්ටු පෙට්ටියම දමා
ඇවිත් හිසෙන් මහ බරක් අහක් කළා මට මතකයි

ඒ දැති රොදය පෙරළුන; රෝද එකට ගැටී නැගුණ
කිරිං කිරිං හඩ පමණක් මගෙ මතකයේ තව රැවු දෙයි

ඊ ඒ ඩෝසන් ප‍්‍රීති
200904

Tuesday, April 7, 2009

"කුහක ගැහැණුන්ගේ... උන්මාද නෙතු අතරෙ..."

"කුහක ගැහැණුන්ගේ... උන්මාද නෙතු අතරෙ..."

නැතිය මෙහි මහ දොළක්
මහ එකා ඇඳ උඩ කලක්
දරුවන් ද දෙදෙනෙකි
උන්ට ද සාගිනි දැනේ


රගමි සුරතාන්ත කෝලමක්
ඇගත් විකුණන තව දෙයක්
එන එකා සිතන්නේ
මෙ කෙලිය මට ද උන්ටම සේය


බඩ උඩ රගන උන් හට
ඉක්මනින් හමාරය ලකුණු කරනට
රගමි සුරතාන්ත කෝලමක්
කරන්නට වෙන දෙයක් නැත මහතුන්

රැයක අවසන දේ මහ දුකක්
තුනටිය ද කැලතුණු විලක්
බෙහෙත් බොමි නිබඳ
මසිරුරම ගිනි ගොඩක්
එන එවුන් එය නොදනිතත්
සියළු ශිල්ප පෙන්වති මටත්
මෝදක ද ගිල දමා'වුත්
වරු ගණන් කෙලිනට ලොලේ


ඈ පවසනු මට නොඇසේ...

"කුහක ගැහැණුන්ගේ
උන්මාද නෙතු අතරෙ
අයාලේ ගිය ජීවිතේ
ඔබෙනි පල ගැනුනේ


'නීනා'
ඔබෙනි පල ගැනුනේ


'හනිලින්'
ඔබෙනි පල ගැනුනේ


'නතාෂා'
ඔබෙනි පල ගැනුනේ


'මරීනා'
ඔබෙනි පල ගැනුනේ..."



ඊ ඒ ඩෝසන් ප‍්‍රීති
200904

Sunday, April 5, 2009

කැත කතුන්ගේ පතිවත පිළිබඳ අධීක්ෂණ වාර්තාව -ජගත් මාරසිංහ


මධුලෝලත්වයේ ව්‍යාකරණ අර්බූදය

[අකාලයේ විශ‍්‍රාම ගැනීමට සිදුවූ සුරා සොඩෙකුගේ පසුවදන = පෙරවදන]


පස්වාන් දහසකට වැඩි කාලක් බලු වූ මිනිසුන් අතරට එක් වී සිටි මගේ කාබනික සිරුර මා නොදැනුවත් ම මහමග වැතිරෙන සඳ අනෙකුන් මෙන් අහක බලාගෙන නොගොස් මගේ තොල කට ලෙවකා සුද්ධ පවිත‍්‍ර කර ගිය සුනඛයන් සිහි කර යාතිකා කරන වග නම්...


බිව්වම පිස්සු හැදෙනවා කියන්නෙ බොරු. බීමෙ ව්‍යාකරණය පැටලුණා ම කායිකව මානසිකව ලෙඩ වෙනවා කියන්නෙ ඇත්ත. බීම කියන්නේ සුන්දර මිනිස් අවශ්‍යතාවක්. ඒකටත් ව්‍යාකරණ තියෙනවා. බීම නවත්තන්න බැහැ කියන්නේ රියල් බොරුවක්. බීම නවත්තන්න බෙහෙත් තියෙනවා කියන්නේ බහුජාතික සමාගම් බොරුවක්. ඒකට ඔන උවමනාව...



දෙවන යාතිකාවෙන්
කැත කතුන්ගේ පතිවත පිළිබඳ අධීක්ෂණ වාර්තාව
ජගත් මාරසිංහ



ජගත් මාරසිංහයන්ගේ කැත කතුන්ගේ පතිවත පිළිබඳ අධීක්ෂණ වාර්තාව අමුතුම පොතක් බව නොකියාම බැරිය. එහි අන්තර්ගත වන්නේ යාතිකාවන් හතරකි. එම යාතිකාවන් පුරුෂ කේන්ද‍්‍රීය සමාජය දික් අතට පළා එහි පැති කඩක් පෙන්වන්නට සමත් වන්නේ යැයි මට සිතේ. කිසියම් දේශපාලනික පසුබිමකින් ව්‍යුත්පන්න වන දැනුම් කෝෂ්ඨයකින් පෝෂිත දඩබ්බර සමාජ විපරිතයකුගේ වාගාවලියක් ලෙස නිර්මිත මෙ ලිපි මාලාව කියවන්නන් නව මානයක් කරා කැඳවා යන්නට සමත් වන්නේ යැයි මගේ අදහසයි.

විවිධ තේමා ඔස්සේ ගොනුවන ජගත් ගේ වියමන් අතර මාක්ස්වාදී විශ්ලේෂණ ද ගණිතමය විග‍්‍රහයන් ද ඒවායේ නිර්මාණශීලි කතෝපකතනයන් බවට ඌණනය වූ ඡේ ද ද බොහෝ වෙ.




මට මෙ පොත කියවද්දී ඩෙස්මන්ඩ් මොරිස්ගේ මනුසත් උයන [Human Zoo] සහ නිරුවත් වානරයා [Naked Ape] මතක් විය. මාක්ස්වාදයේ පදනම් විචක්ෂණ ලෙස ප‍්‍රශ්ණ කිරීම ද මෙම කෘතියේ තවත් විශේෂත්වයක්.

ලිංගිකත්වය මධුලෝලත්වය සහ මනෝභාවයන් ගැන අතිෂය නිර්දය නිර්මාණාත්මක නිගමන වලින් සුපොෂිත ජගත් ගේ මෙ වියමන පාඨනය උදෙසා කදිම වියමනක් බව නොකියා බැරිය. මෙ උපුටනය පිටු අංක 121 හමුවන පුරුෂ ලිංගික හීනමානයන් ගැන ලියැවුනු රසවත් කොටසකි.

'ලිංගික අවයවයන්ගේ ප‍්‍රමාණය ගැන සිතා මානසික විස්සෝපයක් ඇති කරගන්නේ පුරුෂ පක්ෂය පමණක් ම කියන්නන් හට නම් අවලස්සන අනුකම්පා කරයි. තම ජීවිත පලාඵල ඇසීමට යන බොහෝ කතුන් මෙසේ අසන බව අවලස්සන අතදැකීමෙන් දනී. "මට ඇත්තේ බැළලි යෝනිය, එයාට ඇත්තේ ඇත් යෝනිය, එයාගෙන් මට හරිම වෙදනයි. සාත්තරයට කියන අනියම් පුරුෂයාගේ ලිංගික අවයව නම් මට ගැලපෙයි. මම එයාගෙන් වෙන් වුණොත් අනාගතයට ප‍්‍රශ්ණයක් වෙදැ"යි බොහෝ කතුන් විමසනු ලැබෙයි. බොහෝ විට පිරිමින්ගේ ලිංගික අවයවයන්හි ප‍්‍රමාණය පිළිබඳ මානසික අවපීඩන තත්වයක් ප‍්‍රකාෂ වන අතර ස්ත‍්‍රීන් නම් සැබෑ ද‍්‍රව්‍යමය තත්වයන් තුලින් උපන් සිතුවිලි ම බොහෝ දුරට එ වැනි ප‍්‍රශ්ණ සඳහා පාදක වී ඇති වග අවලස්සනට ඉතා හොඳින් වැටහී තිබෙයි. පටලවා ගෙන ඇති ජ්‍යොතිෂ ශාස්ත‍්‍රයේ ලිංග පොරොන්දමෙ සත්‍ය අසත්‍ය බව කුමක් වුවත් මිනිසාගේ ලිංගික ප‍්‍රශ්ණ සඳහා සුපැහැදිලි කතිකාවකට නම් එය විශිෂ්ට සාධකයක් ම වී තිබෙයි. ස්වාභාවයෙන්ම සත්ත්ව සංහතියට උරුම වී ඇති විවිධත්වයේ සංවෙදී ස්වරූපය සිතන ද‍්‍රව්‍යයට ද එහි ලිංගික තාක්ෂණයට ද නැතැයි පැවසීම මුලාවක් බව ද අවලස්සන දනී. එහෙයින්ම විවිධ ස්වරූපයන්ගෙන් ආස්වාදය උරගා බැලීමට ඒක ලිංගික පවුල් දෙපාර්තුමෙන්තුවෙ සීමා සහිත භාවය නිසා ම එ වැනි ආකල්පයෝ බොහෝ මිනිසුන් තුළ හොල්මන් කරයි. ස්ත‍්‍රී යෝනිය දරු ප‍්‍රසූතියෙන් පසු හෝ සැත්කම් වලින් විශාල වන මුත් පුරුෂ ලිංගය බද්ධ කිරීමකින් වත් විශාල කිරීමෙ සිරිතක් නැති නිසා ළදරු පිරිමි දරුවන්ගේ ලිංගයට ගම්මිරිස් පිඹ කොහොඹ තෙල් දුන් අල්ලා එය වර්ධනය කිරීමට පුංචි කල සිටම උනන්දු වූයේ ද මව්වරුන්ම බව පුරාවෘත්තික ඇති දැඩි කිරීමෙ නියාමයන් තුළ ලිංගික වර්ධනයට කරන කියන දෙයින් වටහා ගත හැකි වෙයි. පත්තිනි අම්මාගේ ස්වාමියා වළලා තිබුණේ කොහොඹ රුකක් මුලය. පත්තිනි අම්මා පතිවත ආරක්ෂා කරමින් ඉදිකටුමලක් උඩ සිටගෙන බුදු බව පැතීමත් මව්වරුන් පිරිමි දරුවන්ගෙ ලිංගය වැඩීමට කොහොඹ තෙල් පාවිච්චියක් අතර කදිම ලිංගික දේශීය ක‍්‍රමවෙදයක් පෙන්නුම් කරයි. භගමණියේ ස්පර්ශයෙන් පමණක් ස්ත‍්‍රිය තෘප්තිමත් වන වගත් එ හෙයින් පුරුෂ ලිංගයේ ප‍්‍රමාණාත්මක වෙනස සංසර්ගයේ දී ස්ත‍්‍රී ආස්වාදයට අදාළ නොවන වගත් බටහිර විද්‍යා ක‍්‍රමවෙදයේ සඳහන් කරුණු ආසියාතිකයන් මනාව දන්නා මුත් කාම ව්‍යාකරණයන්ගේ ද‍්‍රව්‍යමය සුවිශේෂයකින් පමණක් විග‍්‍රහ කිරීමෙන් ප‍්‍රශ්ණ නොවිසඳෙන වග අවලස්සනට හිතෙයි.

මෙවැනි මෙනියා තත්ත්වයන් නිසා ම පුරුෂයන් බොහෝ දෙනෙක් ඒකලිංගික පවුල් සංස්ථාව තුළ පුරුෂ චින්තනයේ පටු බවින් නිපන් ගූඨ භාවය නිසාම හීනමාන රොගයෙන් පෙළෙති. '