Saturday, January 24, 2009

භාවනා කරන කළු ගලක් අසල

භාවනා කරන කළු ගලක් අසල

පෙරදින සංවාස කැක්කුම්
තුනටි අත ගාමින් ද
වැට එහා මෙහා දිවීමෙ
ආපදා මරාගැනිලි දෙස් දෙමින්ද
ඉඩම් නඩුවට යන්න
නැකැත් කොල ගුටි කරගත් දෑත් ද
කබල් වෑන් එක හෙට
අනෙකෙක්ගේ කරෙ ගසන
මන්ත‍්‍රය ජප කරමින ද
ශුක‍්‍ර ධාතු තවමත් නොවෙලුනු
දෙකලවින් යුත් සාරංගී ද
පණ ඇති මිනිසුන් පෙති ගසන
ලයිසන් අතැති විරුවන් ද
අපේ කැමැත්තෙන් අප අකමැති දෑ
කරන්නට දේව වරම ලද්දෝ ද

සර්ධාවෙන් වැඳ වැටී සිටියහ


ඊ ඒ ඩෝසන් ප‍්‍රීති
20090124

Friday, January 23, 2009

මහා යුද්ධයක්

පළමුවන ශක වර්ෂයේදී
මහා යුද්ධයක් විය. ශක රාජයෝ ද,
ආරණ්‍ය සේනාපතීහු ද,
බිහිසුණු සේ යුද වැදුණහ.
ඔවුන්ගේ අශ්ව කුරයෙන්
සියලු කෙත් වතු පාලු විය.
ඉන්පසු ගොවීහු මෙසේ ඇසූහ
"කවුරුන් සඳහා වන්නේ ද මෙම මහා යුද්ධය?"
"ඔබ සඳහා" යැයි දෙගොල්ලෝම හඩ නගා පිළිතුරු දුන්හ.
"අනාගතයේ ද අප වැනි වීර පුරුෂයෝ ,
ඔබ සඳහා නියතයෙන්ම බිහි වන්නෝය"

-ශක රාජාවලිය
සයිමන් නවගත්තේගමගේ "සාපේක්ෂනී"

මෙම උපුටනය කුමාරිගේ කෙටි කරපු දිග කතා පුස්තකයෙනි.

සත්‍යවාදියකුගේ දිනපොත-සුනිල් මාධව පේ‍්‍රමතිලක

1986 ජුලි 13

රුසියාවෙ දෙ‍්‍රාහියකු ලෙස පිලිගනු ලැබූ බෝරිස් පැස්ටර්නාක් වාසය කළ නිවස කෙෘතුකාගාරයක් ලෙස ආරක්ෂා කළයුතු යැයි එරට සාහිත්‍ය සම්මන්ත‍්‍රණයක දී යෝජනාවක් ඉදිරිපත් වූ බව පුවත්පතක පළවී තිබිණ. කිසි දිනක රුසියාවෙ ප‍්‍රකාෂයට පත් නොකළ ඔහුගේ ඩොක්ටර් ෂිවාගෝ නවකතාව රුසියන් බසින් පළ කළ යුතු බව ද එහි දී කියැවී තිබිණි. මෙම යෝජනා ඉදිරිපත් කොට තිබුණේ කොමියුනිස්ට් සාහිත්‍යකරුවන්ගේ සංකේතය ලෙස රුසියාවෙ පිළගනු ලබන යෙව්ටුෂෙන්කෝ විසින් බව දුටු මම පුදුමයට පත් වීමි. කොතරම් ශ්‍රේෂ්ඨ මිනිසුන් ද ?

නන්දා මාලනී ගැන කතා කරන්නට අද කිසිවෙකුත් නැහැ. මොනම අසාධාරණයකට වත් විරුදධව කතා කරන මිනිසුන් අද නැහැ. හැම මිනිසෙකුම නිහඩ වෙලා. එසේ නැතිනම් නිහඩ වෙයව් කියන අණට කීකරු වෙලා. මහ කාලකන්නි යුගයක්.

සත්‍යවාදියකුගේ දිනපොත
සුනිල් මාධව පේ‍්‍රමතිලක

Thursday, January 22, 2009

තාප්පයට මුත‍්‍ර කරන නැටුම

තාප්පයට මුත‍්‍ර කරන නැටුම

නගර බිහි දොර
වටදාගෙය පවුර පාමුල
ඩෙනිමක් එකම රිද්මයකට
දෙපැත්තට පැද්දෙමින්
මුත‍්‍රා කරයි

රිද්මය
තාලය
වෘන්දය
විරිත
ශ‍්‍රැතිය

සියල්ල ඇත

මුත‍්‍රා බහුවලය
දෙපැත්තට
සයිනාකාර හැඩයෙන්
සරල අනුවර්තී චලිතයේ

කන් පෙත්ත මත දිලෙන
බ්ලූටූත් කර්ණසංඛය

ජිවිතයට ඇවැසි
රමණිය රිද්මය සපයන
යුධ මද කිපි ගිනිලන
වට පිටක
සිය බර හෑල්ලු කරවන
මුත‍්‍රා නර්තන...


ඊ ඒ ඩොසන් ප‍්‍රීති
20090122

කළු කුහර දූපත


කළු කුහර දූපත

ආලෝකය පිට නොකරන
කළු කුහරය
විද්‍යුත් චුම්භක තරංග
උරා බඩතුර
සගව ගත් කළු කුහරය
විශ්වයේ වටතිරය
ආලෝක පඳුරක්
ගිලගත් පරිධිය

පුවත් නිදහසේ
අඳුරු සෙවණැලි
විදුලියෙන් හඹා යන
උරා ගෙන ගිලා බසින

කළු කුහරය
විශ්වයේ කෙළවර නොව
මෙතනමයි
මෙන්න මෙතන !

දේශාංශක
අක්ෂාංශක අතර හිරවුන
කළු කුහරය
කුංඡ නාද පමණක්

කන් සිදුරු තුල දුවන

කළු කුහරය
විශ්වයේ කෙළවර නොව
මෙතනමයි
මෙන්න මෙතන !!

ඊ ඒ ඩෝසන් ප‍්‍රීති 2009-01-21

[නිමිත්ත කූඹියාගේ "ගාසා?" කවිය]

පෝෂණ උණ්ඩ

ඔෘෂධීය උණ්ඩ

ඔන්න මින් මතු නොවව් කම්පා
බෙහෙත් ගැල්වූ උණ්ඩ දල්වා
පපු සිදුරු හරහා සැනෙන් ගොස්
එසැන ගත මන දොල වඩන්නා

හයිය හත්තිය දියව ගොස් කල්
ඇගිලි කරගැට හැලී කටු වැල්
ලෙසින් ජරපත් දිවිය දිගුකල්
එන්නතකි මෙ උණ්ඩ මනකල්

කඹුරලා සිය දිවිය උපතින්
ලද දෙයක් නැති සොවින් තැතියෙන්
වෙන් වෙලා දරු මල් සියල්ලෙන්
අවි ද අතැතිත ව මගට බස සෙන්

පිලිගන්නට ලතෙත් බැතියෙන්
ප‍්‍රජාතාන්ත‍්‍රික රජය සැරසෙන්
චීනයෙන් ගෙන්වූ බෙහෙත් ගැල්වූ
උණ්ඩ ඇත
භාණ්ඩාගාරයේ නිදි කිරමින්

කලකදී මිනිසුන්ට ආහාර පාන හිගයකින් වැරදීමකින් හෝ දුකක් පීඩාවක් දැනෙන කල දුර සිටම පෝෂණ ආහාර සිරුරට විද ඔවුන් ගලවා සුඛිත මුදිත කිරීම එකල ආණ්ඩුවල වගකීම බැවින් එය ද එසේම සිදුවනු ඇත.

මේ එයට පෙරහුරුවකි.

ඊ ඒ ඩෝසන් ප‍්‍රීති 20090122
නිමිත්ත මහේෂ් මුණසිංහගේ අවම හානිය කවිය

අවම හානිය

උණ්ඩය

සරල රේඛීයව ගමන්

කිරීම අත් හැර ඇත

අහිංසකයින්

බිලින්දන් මගහැර

ත‍්‍රස්තවාදීන්

සොයා යායුතු බැවිනි


ගුවන් බෝම්බ

නොවැටී පාවෙති

පාසල් රෝහල්

මගහැර

බංකර් පමණක්

ඉව කරති

මහේෂ් මුණසිංහ

2009-01



Tuesday, January 20, 2009

සත්‍යවාදියකුගේ දිනපොත-සුනිල් මාධව පේ‍්‍රමතිලක

1986 ජුලි 12

තාත්තා මිය ගොස් අදට වසර 21 කි. හාමුදුරුවන්ට දානයක් දීමට අම්මා තුළ ආශාවක් තිබුණත් හැම දෙයකටම හරස්වන ආර්ථිකය එයට ද හරස් විය. හිගන මිනිසුනට කෑම පාර්සල් කීපයක් බෙදා දීමට තීරණය කළේ ඒ නිසාය. ඒවා බෙදා දීමට වෙලාවක් ලැබුනේ නැත. නගරය මැද කෑම පාර්සල් අතුරුදහන් වූවා සේය. රටෙ වැඩිදෙනා හිගන්නන් වී ඇත.

තාත්තා ගැන මට දුකක් නැත. ඔහු සුන්දරත්වය විඳ මිය ගිය මිනිසෙකි. එහෙත් අද සෑම දෙයක්ම අසුන්දර වී ඇත. ඔහු ලියූ දේ අද ලිවිය යුතු නැත.

සත්‍යවාදියකුගේ දිනපොත
සුනිල් මාධව පේ‍්‍රමතිලක