Saturday, May 18, 2013

සිහින සාප්පුවේ මෙනුව


මම සිහින සාප්පුවට වැද
එකත්පස්ව හිඳ ගනිමි

කේඩෑරි
බැරෑරුම් පෙනුමැති සිහින විශේෂඥයාගෙන්
(සර්පයාගෙන් නොවේ)
සිහිනයක් ඇණවුම් කරමි

උණුසුම්
සරාගී
හැපි එන්ඩ් එකකින් යුතු
සිහිනයක්!

කාල් මාර්ක්ස්ගේ අතිරික්ත වටිනාකම
ලැකාන්ගේ අතිරික්ත ප්‍රමෝදය
එකට කැටි කළ
සිහින සාප්පුවේ මෙනුව
මම දෑසින් ස්පර්ශ කරමි

තේරෙන්නට
ඉඩ
හරිමි

Friday, May 17, 2013

ඒ සැඳෑ...

අප දෙදෙනකුට පමණක්ම
හුදෙකලාවේ නිවැසිය හැකි
කුඩා රෙස්ටොරන්ටුවක්
තිබින ඒ සැඳෑවල

අත් වැසුම් පැළැඳි අත්
නෙක භෝජනාදිය පිරිනැමෙන
දියර ගැල්වූ මිහිරි
ඩෝනට්ටු දීසි මතු වෙන
අරුම පුදුම වේවැල් මේසය
දෙපස අප; මැද මල් පොකුරු
අහසේ සැඳෑව ලකුණු කර හිරු
බලා සිටියේ අප නැගිට යන තුරු

අප නැගිට ගිය පසු
හිරු ද බැස ගිය අයුරු පුදුමය...