Saturday, June 11, 2011

බුබුළුලයි සාගරය!


බුබුළුලයි සාගරය

කුස්සිය කක්කුස්සිය සහ සාල
නැහැ කිසි වෙනස හැකිලී ඇත මිදුල
තඩි ඉබ්බන්ය දරදඩු බර පිත්තල
බැලු බැලු අත
යකඩ පොලු වානේ මළකඩ දම්වැල්ය

අපි අපේ නිවෙස් තුළ
සිරකරුවන් ව ඇත
එද සතුටකි
ජීවිතය තවම අප ළඟ

යකඩ මල් පිපුණු බිම
රොන් සුණු ඊයම් මුසුව
කැමෆ්ලාජ පැළැඳ බඹරුන්
මුව තබයි නොඉවසිල්ලෙන්

යුක්තියේ හිරු ද කඹයකින් ඇත එල්ලා
නොදනී එල්ලුනි ද මන්දා
එල්ලුනැයි කීවොත් මැතිඳා
පිළිගනු මිසක වෙන කුමන් දා

සත්‍ය යේ සඳු ද මිය ගොසිනි විඳ අපමණ වේදනා
මළ මුත්‍ර පහව ගෙල දැඩිව සිරව
අවරදිග අහස කෙළවර
කුරුනෙල් වාර්තා නැතිවම
රක්ත පැහැයෙන් සිතිජය තෙත්ව
දිලිසේ සයුර මතුපිට රුහිරු ඝණ ලප
මකා සාහසිකබවේ කුණප සළකුණු
ලුණු දිය දිලිසේ රක්තාණු මුසු වුණු

වානේ පන්නරය ලබනට
මේ ලේ වැකි අහස
ඇත්තටම ඇති; එතරම් ම උණුසුම්ය
බුබුළුලයි සාගරය!

Friday, June 10, 2011

තිර දැල්වීමට...

Thursday, June 9, 2011

දම් පාට

දම් පාට

පාටක් නැති වතුර
වැටෙන විට නුඹ සිරුර මත
මතුවෙලා පෙනෙයි
නු‍ඹෙ පාට දම් පාට බව

සේදිලා ගිය විටෙක
මඩ පාට දූවිල්ල
මතු වෙලා පෙනෙයි
නු‍ඹෙ පාට දම් පාට බව

ඇද හැලෙන විට වැස්ස
අකුණු පුපුරයි හද ගැබ
සේදුනත් ඇඟ මස් ගොබ
ගිනි ගනී හද අබතුර

බොකුටු හැඩ ගැට ගෙතුණු
අකීකරු කොණ්ඩ මිස‍
නැත සිතක් ගැට ගැසුණු
උල් පතොක් කටු ඔටුණු

තෙත බරිත හරිත පැහැ
තුරු මුදුනක නිසොල්මන
නුඹේ දෑස් මත ඇඳෙයි
මොහොතකට පෙර සමුදෙන්න

හෙට ආයේ එනවාද
අපේ වැඩ බිමට නුඹ
දම්පාට කොල්ලනේ
රන් පාට සිත් පැළැඳ

ඩෝසන් ප්‍රීති
09/06/2011

[ඡායාරූපය බාමෙන්ඩාවේ වැඩ බිමෙනි]

මොන්ට්‍රියෝල් නගරයට ගිම්හානය ඇවිල්ලා -වෛද්‍ය රුවන් එම් ජයතුංග

මොන්ට්‍රියෝල් නගරයට ගිම්හානය ඇවිල්ලා

මොන්ට්‍රියෝල් නගරයේ පටු මාවත් දිගේ
අප ඇවිද යන්නෙමු අතිනත් අල්ලාගෙන
දහසකුත් වූ මිනිස් ප්‍රාණීන් අතර
කෙනෙකු නැත ඇස ගැටෙන

තවත් දිනයක් උදාවී හිරු එලිය
සිප ගනියි කළු ගලින් කල මංමාවත්
රැගෙන එයි උණුසුම් සුළඟ
ගිම්හානයේ සම්ප්‍රාප්තිය පිලිබඳ පණිවිඩය


කහ පැහැති ටියුලිප් මල් සෙලවේ
ගිම්හාන සුළගේ තාලයට
ගයයි ගීතයක් කුරුල්ලෙකු
උසැති මේපල් ගසක අත්තක සිට
සුමුදු විලසින්
නිල් අහස නරඹයි නගරයක අසිරිය
රාත්‍රියේ සඳුට කියා දෙන්නට


වෛද්‍ය රුවන් එම් ජයතුංග

කහ පැහැති ටියුලිප් මල් චිත්‍රය උපුටා ගත්තේ මෙතනින්.