සිමියුලේක්‍රය

මස්තිෂ්කය ඇතුළත
අඳුරුය
කළුවරය
කෑලි කැපෙන තරමට!

හිස් කබොලෙන් වටකුරු වූ
ආලෝක පුංජයක් ඇතුළු නොවන
ඝණාන්ධකාර කුටියකි
මස්තිෂ්ක කුහරය

දෘශ්ටිවිතානය මතට වැටෙන
උඩුකුරුව ඇතුළුව-යටිකුරු වූ ප්‍රතිබිම්බය
රසායන අංශු පේලියක් බවට පත්ව
නික්ම ඇස පිලිකන්නෙන්
ඇතුළු වෙයි අඳුරු මොළ මස වෙත
අඳුරු අහස පලා ඇද වැටෙන
ගිලන් උල්කාෂ්ම වරුසාවක් සේ

අඳුරු මොළ මස තුළ
වර්ණාවලිය හැඳිනෙයි...
අඳුරු මොළ මස මත
වර්ණාලෝක වෙන් වෙයි...

ඇය දුටිමියි සිත තුටුවෙයි!

17/02/2012

පශ්චාත් නූතන සාහිත්‍යය හැඳින්වීමක්-1

හදවත් ශල්‍යකර්මය

සීතලට අපමණ පෙම් කළ
මගේ වියපත් චර්ම වහන්තරාව
ඇගේ උණුසුම් ඡවි කල්‍යානයෙන්
හිරි වැටී ඇත-නිර්වින්දනය වී ඇත

හැව හැරී නාගයෙකු සේ
මා ඉඳී සයනයේ උඩුකුරුව
ජීවිතය දිස්න දේ
දහදිය දිගේ පපුතුර

නිර්වින්දිත සිරුරු මස තුළ
ඈ අත පොවන්නී ගැඹුරු තැන් වෙත
ධමනි-ශිරා-කපාට හරහා
ඉසියුම්ය ඈ සියුමැලි නිය

හදවත හරහා ඇනී තිබූ
දඩු කටුව ඇද දමා
ඈ හති අරින්නී
මා අසල නිදිවර්ජිතව...

10/02/2012

පසු නූතන ප්‍රවණතා 7-බෞද්ධ ප්‍රඥා මාර්ගික සාහිත්‍යය

සිර ගෙවල්

කලකට පෙර
අපි එකිනෙකාට සිර දඩුවම් පමුණුවා ගත්තෙමු
ජීවිතාන්තය තෙක්
සිර ගෙවල් දෙකක විසුමට

වෙන වෙනම සිපිරි ගෙවල තුළ
සිහින දුටිමු ඇතුන් වළසුන් යහන් වටා කැරකෙන
හොඩින් මුවින් නෙළුම් නොව කඩු තෝමර රැඳුන
ශිශිර නිද්‍රාවෙන් මිදුනෙමු ඒ බියකරු සිහින සමගින

නැවතත් සිර දඩුවම් පමුණුවා ගත්තෙමු
බරපතල වැඩ සහිතව
නමුත් පුරුදු සිර ගෙදරම
වසන්නට දිවි ඇති තෙක්ම...

6/2/2012

ඔයා වයසට යන්නෑ නේද?

ඒරාෂ්ඨක එක පිට දෙකයි
ශනි මහ දසාවේ කුජ අන්තරයයි
සේරම ග්‍රහයො කනපිටයි
ජීවිතේම අබග්ගයක් යැයි
ඔයා කියවාගෙන ගිය දා මා දුටුවේ ඔබේ ඩිජිටල් දසුනයි
මයික් මුවේ තවරං ඔබේ මුව මා කන මත අතුරං
"කිසි අයුරක සම්බන්ධයක් අප අතර සුභ නැත
දෙවියන්ටවත් අප නම් එකතු කළ නොහැක
ඔබට ඔබව ද
මා හට මාවද
නොමැති වනු ඇත
අප එකතු වුනොතිං
ආදරයට වඩා බොහෝ දේ ඇත ඉන් පරිබාහිරව
අප අතර විෂමතා ඇති කරන සමතා නැති කරන"

සිහිනයක් සේ ඔබ කී දේ
මායාවක් සේ ඔබ කොඳුරපු දේ
සැටලයිට් අවකාශ අයනගෝල හරහා
තඹ කම්බි ආලෝක තන්තු රැහැන් අතරින්
එක මිටිං ඉවත ලා
යගුලියක් සේ පරසක්වල ගසා
සිහිනයෙන් ඇවිදින්නෙකු සේ
ඔබ සොයා මා පැමිණි මොහොතේ

ඔබ දැල්වූ දෑසින්
මල් වැස්සක චමත්කාරය මවමින්
පවනක් මෙන් පාවී ඇවිදින්
ඇසුවා මතකයි යම්තමින්...

"ඔයා වයසට යන්නෑ නේද? "

2/2/2012