Dawson Preethi | වචන ටැක්සි

බිලේනියම් මම මට අයිති ගහ කොළ මල් වැල් වෙනුවෙන් ඔවුනට මිල දී නැවත මම සතු කර ගතිමි මම මට අයිති මහ පොලොව දිය ඇලි කඳු සිඛර වෙනුවෙන් ඔවුනට මිල දී නැවත මම සතු කර ගතිමි මම මට අයිති හිරු එළිය මද පවන සියොත් ගී රාවය වෙනුවෙන් ඔවුනට මිල දී නැවත මා සතු කරගතිමි මම බිලේනියම් සිටියේ නිවසක පදිංචියට ආවෙමි. ඊ ඒ ඩෝසන් ප‍්‍රීති 2009/02

1986 ජුලි 24 ඇස් වාට්ටුව පැත්තේ මාවතක කුණු බාල්දි අවුස්සන හිගන මනුස්සයා ගැනත් ගල් ගසමින් ඔහු පන්නා දමන ධනපති ගෙවල් හිමියා ගැනත් හැමදාම උදේට මගේ මිත‍්‍රයෙක් කතා කරනවා. අද උදෙත් එහෙමයි. "ලියපල්ලා... ඔවා ගැන. එංගලන්තේ රාජ කුමාරයන්ගේ මගුල් ගැන පිටු ගණන් ලියන උඹල දුප්පත් මිනිහෙක් ගැන ලියන්න අදිමදි කරනවා." හැමදාමත් ඔහු බැණ වදින්නේ ඒ අන්දමටයි. ඔහුගේ කතාව ඇත්ත. ඒත් වෙලාවකට හිතෙනව දුප්පතුන් ගැන ලියලම වැඩක් නැහැ කියලා. අඩ නිරුවත් හිගන මිනිසෙකුට අඳින්න වස්ත‍්‍රයක් නොදී ගල් ගසමින් පන්නන පාහරයින් ගැන එක වැකියක් ලියුවත් පෑනෙ තින්ත ටිකත් අපරාදෙ. මෙය සාප ලද්දවුන්ගේ දූපතයි. මෙය කඳුළු සලන්නන්ගේ දූපතයි. අයුක්තියට හා අසාධාරණයට එරෙහිව නැගී නොසිටින්නෝ සාප ලද්දෝ වෙති. හැම දෙයක්ම දෛවයට බාර දී කඳුළු සලන්නෝ අමනයෝ වෙති. ඇතැම් විටෙක මුළු ලොවටම සාප කරන්නට මට ද හිතෙන්නේ ඒ නිසාය. එහෙත් මා වැරැදියැයි පසුව සිතේ. සාප කළ යුත්තේ ලෝකයේ දුප්පතුන් බිහි කොට පසුව උන් වනසා දමන රුදුරු පාලකයින්ටය. හිත්පිත් නැති සූරාකන්නන්ටය. දුප්පතුන් හා පීඩිතයින් අපේම ලෙයයි. අපේම හුස්මයි. අප ඔවුන්ට පේ‍්‍රම කළ යුතුය. පේ‍්‍රමයෙන් වැළඳග...

නව සඳ බැලීම එන්න පුතේ එන්න දුවෙ අන්න බලන් සඳ එය මත පෙප්සි ලකුණ සොඳ ! නැකතට දැන් ගනිනු පුතේ එක දෙක තුන...පහ අන්න බලන් එක මොහොතක පෙප්සි නැතිව සඳ විනාඩි තුනකට පමණක් සඳ අප වෙත පෑ පෙප්සි සමාගමට මෙන්න අපගේ ගරු සරු සැරද පෙප්සි! 2012 දී සිංහල දෙමල අවුරුදු සමයේ නව සඳ බැලීමට පෙර රජය විසින් විශේෂ ඉල්ලීමක් කිරීමෙන් පසු චිරාත් කාලයක් පවත්වා ආ නව සඳ බැලීමෙ චාරිත‍්‍රය ගැන සලකා බලා පෙප්සි සමාගම විනාඩි තුනකට සඳමත ලේසර කිරණ මගින් හෙලා ඇති සිය ලොගෝව ඉවත් කර දුන්නේය. ඒ විනාඩි තුන සඳහා ශ‍්‍රී ලංකා ජනරජය සහ ඉන්දියාවෙ නව සඳ බලන චාරිත‍්‍රය පවත්වා ගෙන යන ප‍්‍රාන්තයන් සියල්ල එකතුව ඇමරිකන් ඩොලර් මිලියන තුනක් පෙප්සි සමාගමට ගෙවීය. අලුත් අවුරුදු සමරන සියලු ජාතීන් විසින් මෙ නව සඳ බැලීමෙ චාරිත‍්‍රය පවත්වා ගෙන යනු වස් අලුත් බද්දක් ඒ ඒ රජයන් විසින් කැබිනට අනුමැතියෙන් පවත්වන්නට යෙදුනි. ජනතාව චාරිත‍්‍ර වාරිත‍්‍ර පවත්වා ගෙන යනු පිණිස බද්දකට පිවිසෙන ෙඓතිහාසික අවස්ථාවට සතුටින් දායක විය. [මසකට පෙප්සි කුඩා බෝතල හතරක් හෝ ලීටරයේ බෝතල එකක් පරිභෝජනය කළ බිල්පත් ඉදිරිපත් කිරීමෙන් මෙ බද්දෙන් නිදහස් විය හැකි බවට අතුරු පණතක් ද සම්මත ව...

ප‍්‍රචාරණ දැන්වීම් on moon: hurry up! අන්න හඳ මත පෙප්සි සලකුණ! පුන් පෝදා සඳ ඔබ ගෙන ආවොත් පෙප්සි බොතලයක දාලා ඒ පුන් සඳ මම උගුරට බොන්නම් ආතර් සී ටත් පහක් දමා අන්න බලන් සඳවට කැරකෙන චන්දිරිකාවෝ අන්න බලන් සඳමත උන් හෙලන කිරණ දහරාවෝ අන්න බලන් සඳ මහ තිරයක් වී වෙළඳ ලකුණු පැහැරුවෝ අන්න බලන් සඳ හාවා පනින ලක ගින්නට ලේසරයෝ වෙළඳ ප‍්‍රචාරණ දැන්වීම් සඳ මත ඔබෙ ව්‍යාපාරික සලකුණ මුළු ලොවට පෙන්වන්න පැයකට ඩොලර් මිලියනයයි පිස්සු හැදෙන සඳ!

1986 ජුලි 22 ආමර් වීදියේ කපුටන් වහන ගහ යටට අළුත් සිගන්නියක් ඇවිත්. මට එය තේරුම් ගියේ අද දහවල් එතැන ඇති වූ දෙබසකින්. "දැන් මෙකද කරන්නේ?" මහළු ගැහැණිය ළගට පැමිණි තවත් මහළු ගැහැණියක් ඇසුවාය. "ඔව් අනේ. වෙන මොනව කරන්න ද? ජීවත් වෙන්නත් එපායැ......." "දුව කරන්නෙත් ඔය රස්සාවම නේද? මට ඊයේ පෙරෙදා මරදානෙ දී හම්බ වුනා." "ඔව් ඒකිත් දැන් හිගමනට බැහැල. ඒකිට දරුවො හතර දෙනෙක් ඉන්නවනේ " මගේ පපුව හෝස් ගා දැවී යන්නාක් මෙන් දැනිණ. මම මුළු ලොවටම සාප කරමි. සත්‍යවාදියකුගේ දිනපොත සුනිල් මාධව පේ‍්‍රමතිලක

1986 ජුලි 19 එක දිගටම මරණ, බෝම්බ මරණ, සමූල ඝාතන. මෙ මරණ ගැන පැහැදිලිවම පෙනෙන එක් සත්‍යයක් නම් තියෙනව. මැරෙන හැම එකෙක්ම දුප්පතෙක් වීම එම සත්‍යයයි. දෙමළ ධනපතීන් මැරෙන්නෙත් නැහැ. සිංහල ධනපතීන් මැරෙන්නෙත් නැහැ. ඇන කොටා ගන්නේ මරා ගන්නේ දුප්පතුන්මයි. ලෝකෙ කොහෙත් එහෙමයි. අද අපේ මිනිස්සුත් එදිනෙදා ජීවන ප‍්‍රශ්න කතා කරන්නේ නැහැ. හාල්, රතුළූනු, මිරිස් මිනිස්සුන්ට එපා වෙලා වගේ. හැම එකාම කතා කරන්නේ බෝම්බ ගැන. සත්‍යවාදියකුගේ දිනපොත සුනිල් මාධව පේ‍්‍රමතිලක

මල් පිපී තිබුනු පාර දෙපස ගස් කොළං වල පොතු වියලී ගිය මතුපිට ලස්සන පෝස්ටරයක් අලවා තිබුණි. "ගියෝර්ඩානි"..... ......"ජියෝර්ඩානි" ...... "ගියෝ" ද "ජියෝ" ද යනු කුමන වෙනසක්දැයි සිතමින් ඇය බස් නැවතුමෙ නැවතී සිටියාය. ඇගේ පිටුපසින් එක පෙලට එක ළග ඇලවුනු පෝස්ටර පේලි දෙස ඇගේ නිතඹ බලා හිඳී. රිද්මයකට පෝස්ටර දෙස යෙදුනු අවධානය පාරෙ යන බස්වල වෙගයෙන් බැමුමකට ලක්වෙ. ඇය සහ ඇගේ නිතඹ දෙයාකාර අවධානයක... ජි...යෝ...ර්...ඩා.... බසයක් ක්ෂණිකව ගාල් වෙයි. ඇය එතුලට රිංගා ගනී. ඇයට ටිකට් ගන්න මතක් කළ කොන්දොස්තර කොල්ලා ගේ ටී ෂර්ට් එක මැද හරියටම තද කළු අකුරින් "ජියෝර්ඩානි " නැහැ නැහැ "පියෙරෙ කාර්ඩින් " හරියට ම ජියෝර්ඩානි වගේමයි අකුරු...කළු පාටයි ....අමුතුයි ලස්සනයි . ඇය කවුළුවෙන් එලියට දෙනෙත් මෑනුවාය. ජි..යෝ...ර්... ඇයට ගස් කඳන් මත සහ තාප්ප මත වූ ජියෝර්ඩානි මතක් විය. කවුද මෙ ජියෝර්ඩානි ? ඇය නුගේගොඩට ටිකට් ගත්තාය. බසය ගැස්සේ. සෙනග පිරෙ. ඉදිරියට පසු පසට තල්ලු වෙ. මිනිසුන් මහ ගන්දස්කාර ජාතියක් යැයි ඇයට සිතෙයි. ඇය ළගම හුන් කෙනෙක් ඇගේ සිරුරට තෙරපේ. ඇය මුලින්ම සිතුවට...

1986 ජුලි 18 හෙමින්වෙ මිය ගියේ වසර 25 කට පෙර අද වැනි දිනෙකය. එය අද පුවත්පතක පළ වී තිබිණ. ඔහු කියුබාවෙ වාසය කළ කාලයේ දී කස්ත්‍රෝට කී කතාවක් කොහේදෝ පුවත්පතක හෝ සගරාවක පළ වූ බව මට මතකය. ඔහු කීවෙ අද විප්ලවවාදීන් අවශ්‍ය යුගයක් බවය. ඇත්තෙන්ම එදාටත් වඩා අද විප්ලවවාදීන් අවශ්‍යයැයි මට සිතේ. එදාටත් වඩා අද දුප්පතුන් පීඩිතයන් පෑගීමට ලක්ව ඇති කාලයකි. ලෝකයේ බොහෝ රටවල තත්වය එයයි. පීඩිතයන්ගේ නැගී සිටීම වලක්වාලීම සඳහා මර්ධනය අද එදාටත් වඩා රුදුරුය. සත්‍යවාදියකුගේ දිනපොත සුනිල් මාධව පේ‍්‍රමතිලක

නයෝමි ක්ලේන් [Naomi Klein] එයාගේ නෝ ලොගෝ [NO LOGO] පොතේ එක තැනක මෙහෙම කියනවා. අයි බී එම් සමාගම කියනවා ඒ අයගේ පරිඝණක තාක්ෂණය ලොව පුරා පැතිරිලා කියලා සහ ඔවු ඒක එහෙම තමයි නමුත් සමහර වෙලාවට ඒ කියන ජාත්‍යන්තර පැතිරීමෙ ස්වරූපය හරියටම තුන්වන ලෝකයේ රටවල ලාබ ශ‍්‍රමය හරහා බටහිර රටවල ක‍්‍රියාත්මක වන පරිඝණක යන්ත‍්‍රවල චිපයන් සහ ශක්ති ගබඩා පණ ලබනවා වගේ දෙයක්. මැනිලා නගරාන්තයේ මට වයස දාහතක කෙල්ලක් මුණගැහෙනවා අයි බී එම් පරිඝණකවල සීඩී රොම් එකලස් කරන. මම ඇයට කීවා ඒ වගේ කුඩා වයසකින් ඒ තරම් විශෙෂඥ වැඩක් කරන්න තරම් දක්ෂ එකියක් දැකගන්න ලැබීමත් මහ විශාල සතුටක් කියලා. "අපි පරිඝණක එකලස් කරනවා" ඇය මට කීවා. "නමුත් අපි පරිඝණක කි‍්‍රයාත්මක කරන්න නම් දන්නේ නැහැ" අපේ ලෝකය පෙනෙන තරම්ම කුඩා දෙයක් නොවන වග මට මෙවෙලේ තේරුමි ගියා.

රුපියල් තිස් දෙකේ පාන් ගෙඩියක් මිල අඩු කර රුපියල් හතලිස් අටකට විකුණන ලෙස රජය සියලු බෙකරි හිමියන්ට ඊයේ මධ්‍යම රාත‍්‍රියේ සිට අණකර ඇත... මිල පාලනය මිල පා..ලනය මිල පා....ලනය මිල අඩු පාං ගෙඩියක ඇති රස ගුණට වඩා පොලිතින් කවරයක පෙති ගැසු ලේබල් ද ගසා එක්ස්පයරි ඩෙට් සහ නිපදූ දිනද බලා වැඩිපුර ගෙවා කාපිය මෙ පාං ලොලා ඊ ඒ ඩෝසන් ප‍්‍රීති 2009-02

ස්වරය වැහැරී ලප කැළැල් වැකි යොවුන් සඳවත දුටිමි. කම්හල් කහට නැවතුණ රතු මතු නො කළ රතැඟිලි නැවුණු ඉරි යළිදු නො මැකෙන පොඩිවුණු කමිසය තුළ හැඳිනිමි ගැලූ දහදිය සුවඳ. සමනළ පන්ති අතහැර සහතික දමා පා පිස්නාව උදෑසන හිරු රැගෙන නිලූනයනියේ ඔබ හඬවන කම්හල් යතුරු ස්වර සුනිල් ලීවානගේ http://www.silumina.lk/punkalasa/20090215/_art.asp?fn=ar09021514

පුන් සඳත් නෑ මම හිතුව තරම් ඈ සුදුත් නෑ මම හිතුව තරම් ඈ බයත් නෑ මම හිතුව තරම් මම ගැහෙන්න ගත්තා නොහිතු තරම්. ඊ.ඒ. නුවන් චින්තක 2009/02

උමයංගනා, නොවුනත්. . . කියයි නුඹ. . . මට, දිවුරන්ට. . . තබා අත හිස මත, බක්මාසුර නොවුනත්, දැවී යයි මා. . . දහස් වර, අලු ගොඩක් වී, නොවැදී අග්නි සැර, කළ කිරී. . . පිරිමි, ජාතිය ගැන. . . ඊ ඒ නුවන් චින්තක 2009

පන්හිඳ දහසකුත් දේ අතර සුවිශේෂ වූ දෙයකි පන්හිඳ මගේ අතැගිලි අතර සිරවී නොකඩවා ලියන වදන් වැල් ඉරිතැලුන මිහිකතට පිරුණු නදියක් වැන්න සුන්දරත්වය මතින් ඇති කටුක යථාර්ථය වෑහෙන්නේය තුඩගින් හිරුගේ රැුස් ලෙසට අයුක්තිය අසාධාරණය අසත්‍ය දුටු තැන පහර දුන්නේය පන්හිඳ කඩු, කිනිසි, අවි වලින් නොව සියුමැලි තුඩගින්ය මතු දිනෙක මා අතින් ගිලිහිලා ගව් ගණන් දුර පතිත වුව මට දොස් නොතබනු මන්ද ? මගේ අතැගිලි ලිහිල් කරන්නේ මිනිසුන්ය මා ලියන්නේද මිනිසුන්ටය ඉතින් මිනිසුනේ පන්හිඳ කග පතක් කළ හැක්කේ ද මිනිසුන්ටමය ශානිකා කල්හාරි වටෝවිට කලියුගයේ වසන්තය 1996 ශානිකා කල්හාරි වටෝවිට මෙ ලියන්නේ තවත් කිවිඳයක් ගැන නම් නොවෙයි. මෙ ලියැවෙන්නේ මහමෙරක් මෙන් නොසැලුන අකම්පිත ආත්මයක පරිකල්පනීය දිග පළල පිලිබඳ මිනින්දොරුවකුගේ සටහනකි. කලියුගයේ වසන්තය ශානිකා කල්හාරි වටෝවිට ගේ ප‍්‍රථම කාව්‍ය සංග‍්‍රහයයි. ඇය මෙම කාව්‍ය සංග‍්‍රහය පළ කරන්නේ 1996 දීය. 1992 දී පමණ ඈත දුරාතීතෙක මට ඇයගේ කවි කියවා මතක ඇත්තේ රාවය පුවත් පතිනි. එකල මට හැගුනේ ඇය ද අප මෙනි. එහෙත් වැඩි කලක් යන්නට මත්තෙන් එම රාවය පුවත් පතේම පළ වූ ඇගේ සංලාප සටහනකින් මා දැනගත්තේ ඇය අප මෙන් නොවන ...

රාජිනී නිවුන් සොයුරු පෙම සිර වී දෙතැනක කඳුළු ගණින විට දිනුවෙ කවුරු ද වැඩහිටි කන්දෙන් සුපිපුණු ඉරමල හිනැහුණු අන්දම අමතක වෙනව ද උතුර දකුණ දුර අඩුවෙන දවසක නෑගම් එන්නට අමතක වෙනව ද පමිත ආර් ලියනගේ ආදරය සහ සඳ එළිය 2008 සූරිය කඳු වලප අවාරයේ අකුණු සරින් සමනල තටු බිඳුණා සූරිය කඳු හිස මුදුනින් හිරු පර වී වැටුණා කාකි අඳුර ගෙට එනකොට තරු කඳුලින් පෙගුණා වළවෙ ගං දෑල පවා ඉකිලන හඩ ඇසුණා දුක් කඳුලින් ගෙත්තම් කළ මල සුවසේ වැඩුණා මල පීදි එන්නට පෙර නටුවට වෙඩි වැදුණා පමිත ආර් ලියනගේ ආදරය සහ සඳ එළිය 2008

ධර්ම චක‍්‍රය පච්චා කොටන තැන මකර රූ - කිනිසි - සරපයි හෙළුවැලි ගෑණු අතරින් උඹ තෝරා ගත් පච්චය ධර්ම චක‍්‍රය සෝමෙ පුදුම මිනිහෙක් උඹ හිනා නොවෙන - නොහඩන බලන්නන් බැල්මෙන් බය කරන මන්ත‍්‍රී ළගවත් නොනැමෙන තර තළෙළු මූණ - රතු ඇස් කළු උඩු රැවුල කහ දත් කුණු හරුප ගෝරනාඩුව සමග තිබුනාට පපුව මත ධර්ම චක‍්‍රය තිබුණාද ධර්මයක් පපුව යට? බූරු පෙතකුදු නාරින මඩම් අස්සේද රිංගන ඉඳහිට හිරෙත් යන උඹටත් හැබෑටම තිබුණ ද? මොකක් හරි ධර්මයක් අදහන හෝටල් ළග - සැලුන්වල සති පොලේ - වින්කලේ - විට කඩෙ ගැවසෙන - පච කෙළින මස් කන - අරක්කු බොන - ගංජා උරන සෝමෙ පුදුම මිනිහෙක් උඹ ඒරියා එකේ බජාර් එකේ කාට වුණත් අත තිබ්බොත් අගල් හයක් බස්සනවා කියන සෝමසිරි උඹ එහෙම බැස්සූ බවක් නම් අසා නැත අප එනමුදු අසා ඇත වීදියේ බලු පැටව් වඩාගෙන දෙගොඩහරි ජාමෙත් උඹ මස් කොත්තු කවන වග කප්පම් ජෙරාගෙ සව්වන්ට අහුවුණු තැන තලන සෝමෙ පුදුම මිනිහෙක් උඹ මුඩුක්කුවෙ පොඩි උන්ට පොත් පත් තෑගි ගෙනියන්න ජැටියේ අල ගෝනි උස්සන දාඩියෙන් පෙගී - මවිල් අස්සෙන් දිලිසෙනවා සෝමසිරි ධර්ම චක‍්‍රය උඹෙ පපුව මත ලක්ශාන්ත අතුකෝරල ...

1986 ජුලි 17 පෝය ළග විය යුතුය. අඩ සඳ පායා ඇත්තේ එනිසාය. සඳ වටා තරු කීපයක් ද ඇත. එහෙත් සඳ තරු පෑයූ රාත‍්‍රියේ කිසිම සුන්දරත්වයක් නැත. කවි සිතුවිලි පහළ වන්නේ ද නැත. සඳ තරු ගැන කවි ලියූ යුගය ගෙවී ගොස් බොහෝ කල් යැයි මට සිතේ. මෙබඳු රාත‍්‍රීන් හිදී දැන් නෙත ගැටෙන්නේ මහා බියකරු දර්ශනයන්ය. අපගේම දැරියන් අපගේම සහෝදරියන් සල්ලාල ධනපතීනට ගොදුරුවන්නේ මෙබඳු රාත‍්‍රියන්හි දීය. ඊයේ රාත‍්‍රියේද මෙලෙසම අඩ සඳ පායා තිබිණ. සඳ වටා තරු කීපයක් ද තිබුණ බව මට මතකය. මෙ සියල්ලක්ම මා දුටුවෙ අවන්හලින් එළියට බසින මොහොතේදීය. සුරා විතක් තොල ගෑමෙ අරුත විකාර දේවල් දැකීම නොවෙ. ඇතැම් විට සැබෑම සත්‍යය දකින්නේ එබඳු අවස්ථාවල දීය. මා වෙත පැමිණි දැරියක් කිසිවක් ඉල්ලා සිටියාය. ඇයට අවුරුදු දොළහකට දහතුනකට වඩා වයස නැතැයි සිතේ. මගේ සාක්කු ද හිස් ය. ඇය කිසිවක් නොදොඩා ඉවතට ගියාය. අසල නවතා තිබූ මෝටර් රියක් වෙත ගිය ඇය එතුළ සිටියවුන්ගෙන් පිනට යමක් ඉල්ලන අයුරු මම දුටුවෙමි. මිනිත්තු කීපයක් යන තුරුම ඇය එතැන සිටියාය. "..............අනේ මහත්තය....... මම එහෙම එකෙක් නොවෙයි. මට කීයක් හරි දෙන්න. පිං සිද්ද වෙයි......." ඇය බැගෑපත් වන අයු...

1986 ජුලි 15 බොහෝ කලක සිට මගේ මිත‍්‍රයකු වන කුලරත්න අත් අඩංගුවට ගත් බව අද දහවල් ආරංචි විය. ඔහු කළ වරද ජූලි වර්ජනය සමරා පෝස්ටර් ගැසීමය. ගිය වසරෙත් මෙ කාලයේ දී ඔහු සිටියේ සිරකූඩුවෙය. වර්ජනයෙන් පාරට බැස්සවුන් පෝස්ටර් ගහන්නේ නැතිනම් පෝස්ටර් ගැසිය යුත්තේ උන්ව පාරට දැම්ම එවුන් ද ? මට නම් මෙ ප‍්‍රජාතන්ත‍්‍රවාදය තිත්තයි. කුලේගේ බිරිඳට දුව උපන්නේ ඔහු ගිය වසරෙ හිරෙ සිටිය දීයි. ඔහු බලන්න ගියවිට කී කතාව මට දැනුත් ඇහෙනව වගෙ. "මම දුවට දාපු නම උඹ දන්නව ද... සානා මෙදානි. සානා මෙදානි කියන්නෙ කවුද දන්නව ද ? උඹට මතකද ඊශ‍්‍රායල භටයින් පුරෝගෙන ගිය ලොරියට බෝම්බ පුරවාගත්ත කාර් එකක් හප්පපු පලස්තීන කෙල්ල. භටයොත් කුඩු. කෙල්ලට ගරු කරන්න තමයි මගෙ දුවට ඒ නම දැම්මෙ." දිනපොත තුළින් කුලරත්න සහෝදරයාගෙ හිනාව පිරුණු මුහුණ මට පෙනව. මං ඌව ඉඹ ගත්ත. සත්‍යවාදියකුගෙ දිනපොත සුනිල් මාධව පේ‍්‍රමතිලක

ගසක අරුම ගෙදරට එන- පාරෙ දුවන බෙන්ස් වලට රිකිලි සලා ටටා කියන මැදුරෙ තේජසින් යැපී පිළිල හංගගෙන බඩවත මහත දෙහෙත අතු ඉති ලන නුග ගස නුඹ... කටුසර පොළොවෙ දළුලන මහමග දූවිලි වළඳන මන්දපෝෂනෙන් ඔත්පල වුණ ගස් වෙත වෙලුන නුග කොළ විසිකර කොචොක් කරන... කෙසග ගසක පුංචි ම අතු සොදුරු මල් කැකුළු පුබුදා සුවද ඉසින විට පවනට කාක්කන් ලවා මුහුණට වසුරු හෙලන ගසක මහිම බල අතු අග හිස් බව පීදී ලඹ දෙන... නූතන ගුරුවරයෙකුට - සිසුවෙකුගෙන් "කලංකය කීලය මනිපත‍්‍රය මුකුටය අරක මෙක අහවල් එක" "හත්වලාමෙ ඔය ඇති මං කැමති විදිහට මලින් මල විඳින්නට ඉඩක් නැති හැටි" රවි සිරිවර්ධන 2001 රවි සිරිවර්ධනයන්ගේ දෙවන කාව්‍ය සංග‍්‍රහය වන පිළිසදරින් උපුටා ගන්නා ලදී .

ආදරෙයි මම තවම නිවමි ලන්තෑරුම නොපෙනෙන්න නුඹෙ බඩගිනි ඇස් යුවල තරුළු වෙමි තවත් ඇටකටු වලටම උණුසුම් සුසුම් අතරින සොයමින් එදවස තුරු ලපළු මඩුළු යට තලා පොඩි කල ගඳපාන මල් සුවඳ ඊ ඒ ඩෝසන් ප‍්‍රීති 2006

මී පුප් ලදිම් චණ්ඩාල වැද්දා වීමි පෙරදින ඉලක්කය ගෙන මුදාහැර තල වෙන් කලේ නුඹ ලිහිණියකගෙන් තබන්නට පිය බිරිය තනතුර නොතන අංකුර බීජ නවථල විඩාපත් විය බිඟුපති රොනලොල පතිත වන තුරු රශ්මි සඳතුර වලප්නා සක්වාලිහිණි යුවළද සමග දිවයුරු නැවත පෙම් රඟ දවට මියුරස තෙපුල් සියොලඟ පෙන්වමින් සත් ගවු නියම් දුර අසබඩව කැළතෙන රාහුමුව ඊ ඒ ඩෝසන් ප‍්‍රීති 2006