AI එකට විඥානය (Consciousness) තිබුණොත්? — Sam Altman කියන මේ කතාව අපි හැමෝම අහන්න වටිනවා!
AI එකට විඥානය (Consciousness) තිබුණොත්? — Sam Altman කියන මේ කතාව අපි හැමෝම අහන්න වටිනවා!
AI එකක් මිනිසෙකු වගේ කතා කළාට, ඒක මිනිසෙක් වෙනවද? AI එකකට විඥානයක් තිබිය හැකිද? එහෙම තිබුණත්, අපේ ජීවිත ගැන තීරණ ගැනීමේ අයිතිය ඒකට පැවරිය යුතුද?
OpenAI ප්‍රධාන විධායක නිලධාරී Sam Altman සමඟ පැවැත්වූ මේ විනාඩි 45ක සාකච්ඡාව, අද AI භාවිත කරන සෑම කෙනෙකුම අවධානයෙන් නැරඹිය යුතු එකක් කියලා මම හිතනවා.
විශේෂයෙන්ම 20:12 සිට ආරම්භ වන AI Consciousness පිළිබඳ සංවාදය ඉතා වැදගත්.
Altman ගේ පෞද්ගලික විශ්වාසය අනුව වර්තමාන AI ආකෘති විඥානය සහිත ඒවා නොවෙයි. නමුත් ඒ පිළිබඳ නිශ්චිත විද්‍යාත්මක පිළිතුරක් තවමත් නැති බවත් ඔහු පිළිගන්නවා.
මෙහි වඩාත් සිත්ගන්නා කාරණය එපමණක් නොවෙයි.
AI එකකට විඥානයක් තිබෙන බවට අපි විශ්වාස කරන්න පටන් ගත්තොත්, එය සමඟ අප ගොඩනඟාගන්නා සම්බන්ධතාවට මොකද වෙන්නේ? අපේ තීරණ, ආශාවන්, විශ්වාසයන් සහ මානව සම්බන්ධතා එයින් වෙනස් වෙන්නේ කොහොමද?
AI එකක් අපට නිතරම එකඟ වෙනවා නම්, අපව අගය කරනවා නම්, අපට අවශ්‍ය දේම කියනවා නම්, එය සැබැවින්ම අපේ චින්තනය දියුණු කරනවාද? නැත්නම් අපේම විශ්වාසයන් නැවත අපට පෙන්වන කැඩපතක් බවට පත්වෙනවාද?
අපි දැනටමත් දන්නා වචනවලින්, මෙතෙක් නොසිතූ අදහස් ගොඩනඟාගෙන, අලුත් දැනුමක් නිර්මාණය කරන්න අපට පුළුවන්ද? එසේත් නැත්නම්, අපි අලුත් දැනුමක් කියලා හඳුන්වන්නේ දැනටමත් දන්නා දේවල් අලුත් ආකාරයකට සකස් කිරීමක් පමණක්ද?
මේ දාර්ශනික ප්‍රශ්න දහරාව අනාගතයේ කුමන දිසාවකට ගමන් කරයිද කියන කුතුහලය මට නම් ඇති වුණේ මේ සාකච්ඡාව නරඹමින් සිටියදීයි.
විශේෂයෙන්ම, AI සමඟ අප ගොඩනඟාගන්නා සම්බන්ධතාව තුළ අපේම චින්තනය, ආශාව සහ අනන්‍යතාව කෙතරම් දුරට වෙනස් විය හැකිද?
මෙවැනි ප්‍රශ්න මනෝවිශ්ලේෂණය, දර්ශනය, භාෂා විද්‍යාව සහ සංජානන විද්‍යාව සමඟ සම්බන්ධ කරමින් තවදුරටත් විමසා බැලිය යුතුයි. සාකච්ඡාවේ තවත් වැදගත් අදහසක් වන්නේ AI මඟින් මිනිසාගේ නිර්මාණශීලීත්වය, ස්වාධීනත්වය සහ තීරණ ගැනීමේ හැකියාව අහිමි නොවිය යුතු බවයි.
AI තාක්ෂණයේ අනාගතය ගැන කතා කරන විට, අපි අසන්න ඕනෑ AI එක කොතරම් බුද්ධිමත් වේවිද කියන ප්‍රශ්නය පමණක් නොවෙයි. ඒ බුද්ධිය ඉදිරියේ මිනිසාගේ ස්ථානය කුමක් වේවිද කියන ප්‍රශ්නයත් අසන්න ඕනෑ.
මේ සාකච්ඡාවට සවන් දෙන්න. විශේෂයෙන්ම AI සමඟ දිනපතා කටයුතු කරන අයට මෙය ඉතා වැදගත් වේවි.
