එතර සිට කරන ඉල්ලීමකි -සුනිල් ගෝවින්නයන්

ඕස්ට්‍රේලියාවේ වෙසෙන අපේ ද්විභාෂා පාරප්‍රාප්ත කිවිඳා වන සුනිල් ගෝවින්නයන් මා වෙත කවියක් එවා තිබුනේ ඊයේ ය. හෙතෙම තම මතක දිවයිනේ හැඟුමන් මතකයෙන් ජීවය ගන්වා වදන්වලට පෙරලා කොළඹ ගංවතුර ගැන පද බැන්ද ඒ මනෝහර කවිය මා සිත කැළඹුවේය. මේ එම කවිය සහ මා විසින් පිළිතුරු කොට යැවූ කවිද එක්කොට මෙහි තබමි.

එතර සිට කරන ඉල්ලීමකි

ලියන්නේ කවි කුමට මතක සඟවන රටට
ලැබෙන්නේ නැත සරණ ලියූමුත් කවි නිබඳ
පතන්නේ කවි බසක් නොව හදකි බස් දොඩන
සිතන්නේ ගං වතුර ඔබේ රට ගොදුර වෙන

දෙරට තොරතුරු අතර ශෝකයකි ගං වතුර
ලියන කවියක් වුව ද පාරුවක් නොවනු ඇත
බඩගින්න මැද හඬන දුක් තැවුල් මැකෙනු නැත
කවි මගින් එවන්නට නොමැත තිළිණයක් අද

දෙව් බඹුන් උරණ වී එවූ මහ වැස්සක් ද
සරණ නැති දන නෙතට නැගි කඳුළු ගංඟා ද
රට රකින නිරිඳුන්ට එවු සාප වැස්සක් ද
ලියා දන්වනු මැනවි දිනෙක කිවිසුරු සබඳ

2010 මැයි 20
SG

පැරකුම් මැතිඳු මෙන්
ලියමි කෙටියෙන්
නො ඉල්ලනු නැවුම් කවි
නැත එබන්දක් ලියැවී!
‍
දෝර ගලා යන
දෙව් මිනිස් ගැටුමක ලේ යුෂ
නගර බිහිදොරින් ඇරඹි
පල්දෝරු පිසිමින් ගලා යයි
ඉතිං තවත් කොහෙන්ද දෙවිවරු
උන්ගේ ලේ කඳ නොවැ මේ විසිරුණු
මඩ පාටින් මේ සුගන්ධයෙන් රුදු
ගලා යන්නේ පිස මැදුරු දේවතා කොටු
නො ඉල්ලනු මැනවි නැවුම් කවි
නැත එබන්දක් ලියැවි මා සුමිතුරු
පාරු ගමන සැසලෙයි හද බැඳි ගුරු
වාරු වෙමින් සිටිමි වෙත ලොව්තුරු

DP


පැනයක්

වෙද තවත් නැවුම් කවි මතක දිවයින සබඳ
රජ මැදුරු පිරී ගිය කිතු යසස් ගී මිසෙක?

දෙව් මිනිස් ගැටුම් ගැන නැත අසා සබඳ තව
රජුන් ගැන දෙඩු කතා පමණි එතරට ඇදෙන!

දේවතා කොටු මැදුරු තවත් ඉතිරිව ඇද්ද
මඩ පාට සුගන්ධයෙ දියර ඇදෙනා රටක?

ගං වතුර ගැන පුවත් අසා දුක් වූ දිනෙක
කියවීමි රජතුමා මලණුවන් යැවූ බව
දඬු මොනර-යක් තුළින් දුක් පුවත් සොයන්නට!

මුළු ලොව ම වියරු කළ ත‍්‍රස්තයන් දැවූ රට
ගංවතුර නැති කරන බල නැද්ද රජුන් වෙත?

ඔබ ද මා පිය මිතුර
ලිය යුතුව නැත ලගුව
නොවේ පැරකුම් කිවිඳ
වේය ඔබ මහ කිවිද!

SG

ලයිෆ් ඔ‍ෆ් පයි කියවමින් සිටිමි මම දියබරියෙකුව
සීතල කැඳවයි උණුසුම් පොත් මා තුරුළට; කෝපි කෝප්ප මුවටද!

සාගරයක් මැද සිරවුනු හැටි ලිහෙයි මා මසැස මත
කොල්ලෙකු කොටියෙකු සහ බෝට්ටුවෙකු අනාතව
අපට නම් සාගරය අපරිමිතය හැම කල මේ කියවන තුරු
එහිද සිරවන්නන් හමුවේ මෙබඳු පොත්පත් තුළ ගරු කටයුතු

මහ වැසි වැස හිස ගිනි ගත් සඳ හාත්පස දියත
වැසිවලටද ඇවිලවිය හැකි බැව් දැනෙයි දුරුවල සිත
නොලා දන මන සිහිසුන්ව; රජ මැති සඳ ඉගිලෙන අහස් කුස
හෙලිකොප්ටරය බැගින් දිළිදන්ට දන් දෙන දිනය මෑතය සොයුරු

DP