සොහොන් මාළිගයමිය ගිය
සහ
මරන ලද
සුවහසක් මිනිසුන්ගේ ඇට කටු
එකට තබා
සදා ඇත මගේ මන්දිරය
සුවිසල් ය එය!
තබා ඇත හිස් කබල්
විවර වුණු බොල් ඇස් සිදුරු
කවුළු ලෙස
හමා එනු පිණිස
මිනී අළු මුසු මද පවන්!
දරුණු විලි රුදා දැරූ
උකුළු ඇට;
තබා ඇත ආලින්දයේ
සිහිවටන ලෙස නෙක
නොනැගෙන්නට නැවත
නැගිටීම්
අපගේ පෙළපතට එදිරිව!
රහසිගත
භූගත කුටියක
තබා ඇත එක පෙළට
නොනැමුණු කෂේරුකා
සිහි කැඳවනු පිණිස හෙට දිනට!
ලද අවසරයෙන් අමතක වන
මගේ කාලකණ්ණි අන්තේවාසිකයනට
මොවුන් නැගි බව අපට එරෙහිව
මතක් කර දෙන්නට දිවා රැය!
ඩෝසන් ප්‍රීති
271009
No comments:
Post a Comment